Праект «Бацькаўшчына». Навагрудскі замак з’яўляецца ўнікальным помнікам абарончага дойлідства эпохі сярэднявечча

Праект «Бацькаўшчына». Навагрудскі замак з’яўляецца ўнікальным помнікам абарончага дойлідства эпохі сярэднявечча

14 марта 2022 1357

Навагрудскі замак з’яўляецца ўнікальным помнікам абарончага дойлідства эпохі сярэднявечча.

На працягу XI – XVI стст. умацаванні замка прайшлі шлях ад прасцейшай агароджы-частаколу да магутнейшага шматвежавага замка. У 1506 годзе замак вытрымаў аблогу вялікай татарскай арды султана Біці-Гірэя. У час руска-польскай вайны 1654-1667 гадоў рускія войскі двойчы бралі Навагрудак. У верасні 1655 года яго занялі казакі І. Залатарэнкі. Часткова адноўлены ў 1660 годзе замак без бою быў заняты войскамі князя А. Хаванскага: наёмны гарнізон, які своечасова не атрымаў плату за службу, адчыніў вароты. Потым вежы замка Менская, Калодзежная, Малая брама і Пасадская, а таксама праслы сцен былі разбураны да падмуркаў. Канчаткова ўдар па замкавых мурах нанеслі ў 1706 годзе шведы ў час Паўночнай вайны.

К пачатку ХІХ ст. ад замка на дзядзінцы часткова ўцалелі тры вежы: Дазорца, Шчытоўка і Касцельная.

З 1956 года Навагрудскі замак стаў аб’ектам вывучэння археолагаў, якія адкрылі шмат цікавых старонак з яго гісторыі.

Рэшткі Навагрудскага замка – помнік рэспубліканскага значэння. Ён яркі сведка багатай шматвяковай мінуўшчыны. З 2012 года на замку вядуцца рэстаўрацыйныя работы па захаванні рэшткаў гісторыка-культурнай каштоўнасці, якія фінансуцца дзяржавай.